طريقة استخدام المترو فى القاهرة

طريقة استخدام المترو فى القاهرة


  إذا كنت هتركب مترو القاهرة لأول مرة فى حياتك تابع الموضوع ده للآخر لأننا هنتكلم بشكل تفصيلى عن طريقة استخدام المترو بدءا من دخول محطات المترو وقطع التذاكر وأسعار التذاكر والخطوط والإتجاهات ومحطات المترو الخاصة بالتغيير أو التحويل للخطوط الاخري

نبدأ الشرح

أول حاجة لما تدخل محطات المترو هتلاقي بوابات الكترونية زي اللى فى الصورة .. البوابات دي بتمنع دخول الأشخاص الا بإستخدام تذكرة المترو .. لذلك لا تحاول المرور منها الا بعد شراء التذكرة .. ابحث أولا عن شباك التذاكر وقول للشخص اللى واقف فى شباك التذاكر إسم المحطة اللى أنت ذاهب اليها وهو هيحسب سعر التذكرة ويطلب تمنها منك


ده شكل تذكرة المترو من الأمام ومن الخلف




بعد شراء التذكرة قم بإدخال التذكرة فى المكان ده فى البوابة الإلتكرونية
 (ممكن تدخل التذكرة من الوجهين عادي )



بعد وضع التذكرة قم بالمرور من على يسار البوابة مش يمينها
هتلاقي مانع حديدي زي اللى فى الصورة ادفعه وعدي لأن خلاص البوابة كدا هتسمحلك بالمرور



ملحوظة : لو لقيت احد البوابات الإلكترونية عليها علامة خطأ بهذا الشكل إعرف ان البوابة مش شغالة وشوف بوابة تانية



بعد المرور من البوابة هتلاقي نفسك على الرصيف الخاص بقطار المترو عشان تركب 

 لكن قبل الركوب لازم تعرف اتجاه المكان اللى انت رايح له .. لأن كل خط فيه قطارين واحد للذهاب والثاني معاكس .. يعني مثلا خط (حلوان - المرج ) اول محطة على الخط هي حلوان واخر محطة هي المرج .. على نفس الخط فيه قطارات متجهة من حلوان للمرج وفيه قطارات متجهة من المرج لحلوان .. فلازم قبل ماتركب تعرف المكان اللى رايحله فى اي اتجاه فيهم .. تابع معانا باقي الشرح عشان تعرف كل شئ بالتفصيل

محطات المترو والخطوط والإتجاهات 

يوجد فى القاهرة 3 خطوط للمترو وحاليا يتم عمل الخط الرابع
لذلك وقبل كل شئ لازم تحدد الخط اللى هتركبه واللى هيوصلك للمكان اللى انت عاوز تروحه

طيب ازاي اعرف خط المترو؟

بكل بساطة هتحمل التطبيق ده وهو تطبيق رسمي خاص بشركة المترو فى القاهرة ويوجد داخل التطبيق خريطة لخطوط واسماء محطات المترو ومنها هتعرف اي خط منهم اللى هتركبه وكمان هتقدر تحدد الإتجاه وكمان  هتعرف ازاي تغير من خط لخط تاني

بعد فتح التطبيق إضغط على خريطة المترو كما بالصورة

بعدها هتظهر خريطة المترو وفيها كل محطات المترو بهذا الشكل .. كل خط من الخطوط بلون مختلف  .. فمثلا الخط الأول هو خط( المرج - حلوان) اللى باللون الأزرق .. هتلاقي اسماء كل المحطات على الخط ده و مكتوبة بالترتيب


 طيب دلوقتي على سبيل المثال إذا حبيت تروح من محطة مترو المعادي الى محطة مترو الملك الصالح هتعمل ايه ؟

الخطوة الأولى تحديد الخط :

هتفتح خريطة المترو وتحدد الخط اللى عليه محطات المترو اللى انت عاوزها
واللى هو طبعا فى هذا المثال الخط الأول (المرج - حلوان)

الخطوة الثانية تحديد الإتجاه :


لأنك هتنتقل من محطة مترو المعادي الى محطة مترو الملك الصالح  .. ده معناه انك هتركب القطار المتجه بإتجاه المرج يعني هتروح تقف على الرصيف الخاص بإتجاه المرج وتستني القطار لحد مايوصل.. هتقدر تحدد الإتجاه كمان من خلال خريطة محطات المترو .. لماتعدي من البوابات الالكترونية وتكون على رصيف القطار هتلاقي لافتة على الرصيف مكتوب عليها الاتجاه .. لو مقدرتش تشوف اللافتة اللى عليها الاتجاه إسأل اي شخص من الأشخاص اللي واقفين ده اتجاه ايه؟ 

طيب لو كنت محتاج اتجاه المرج ولقيت نفسك على رصيف اتجاه حلوان .. تعمل ايه؟

بكل بساطة هتسأل اي شخص من اللى واقفين ازاي تروح الناحية التانية على الرصيف المقابل فى اتجاه المرج .. وهيقولك على السلم اللى هتنتقل منه على الرصيف المقابل

طيب لو عاوز تنتقل بين محطات المترو على خطين مختلفين .. يعني على سبيل المثال عاوز تروح من محطة على الخط الأول الى محطة على الخط التاني ؟

لنفترض مثلا انك عاوز تروح من محطة المعادي (على الخط الأول) 
الى محطة الجيزة (على الخط التاني)

الخطوة الاولى :

هتركب من محطة المعادي الى محطة السادات

الخطوة الثانية :

هتغير من الخط الأول الى الخط الثاني فى محطة مترو السادات
يعني لما تنزل المحطة إسأل ازاي اروح خط ( المنيب - شبرا) الناس هتعرفك ازاي تروح خط المنيب شبرا
وكمان ممكن تلاقي لافتة مكتوب عليها( خط المنيب شبرا )بتعرفك السلم اللى هيوديك الخط الثاني

الخطوة الثالثة :

لما تروح خط المنيب شبرا إختار الرصيف الخاص بإتجاه المنيب .. لأن عشان تروح محطة الجيزة هتركب القطار المتجه الى المنيب

محطات المترو الخاصة بالتغيير من خط إلى آخر

يعني المحطات اللى تقدر من خلالها تنزل وتركب خط تاني

للتغيير بين خط المترو الأول والثاني

محطة مترو السادات , محطة مترو الشهداء

للتغيير بين خط المترو الأول والثالث

محطة مترو ناصر

للتغيير بين خط المترو الثاني والثالث

محطة مترو العتبة

ماهي مواعيد القطارات فى محطات المترو ؟

بيجي قطار كل خمس دقائق يعني لو فاتك قطار عادي لان بعد خمس دقائق بالظبط هيجي واحد تاني فى محطة المترو اللى انت فيها

كيفية معرفة سعر التذكرة ووقت الرحلة بين محطات المترو ؟

 قم بكتابة إسم محطات المترو التي هتركب منها واللى عاوز تروح ليها و اضغط خطة الرحلة كما بالصورة



سيتم فتح هذه الصفحة والتي تخبرك بمدة الرحلة وأيضا سعر التذكرة



كما تري فى الصورة 
المدة:
 16 د
 يعني 16 دقيقة
سعر التذكرة :
5.ج.م
  يعني خمسة جنيه مصرى


اسماء محطات المترو فى كل خط

محطات المترو للخط الأول  ( خط حلوان المرج ) :

-حلوان
-عين حلوان  
-جامعة حلوان  
-وادي حوف  
-حدائق حلوان  
-المعصرة  
-طرة الأسمنت  
-كوتسيكا  
-طرة البلد  
-ثكنات المعادي  
-المعادي  
-حدائق المعادي  
-دار السلام  
-الزهراء  
-مار جرجس  
-الملك الصالح  
-السيدة زينب  
-سعد زغلول  
-السادات   
-ناصر   
-عرابي  
-الشهداء   
-غمرة  
-الدمرداش  
-منشية الصدر  
-كوبري القبة  
-حمامات القبة  
-سراي القبة  
-حدائق الزيتون  
-حلمية الزيتون  
-المطرية  
-عين شمس  
-عزبة النخل  
-المرج  
-المرج الجديدة  

محطات المترو للخط الثاني ( شبرا الخيمة - المنيب ) :

-المنيب
-ساقية مكي
-أم المصريين
-الجيزة
-فيصل
-جامعة القاهرة
-البحوث
-الدقي
-الأوبرا
-السادات
-محمد نجيب
-العتبة
-الشهداء
-مسرة
-روض الفرج
-سانتا تريزا
-الخلفاوي
-المظلات
-كلية الزراعة
-شبرا الخيمة

محطات المترو للخط الثالث :

-المطار
-عدلي منصور
-الهايكستب
-عمر بن الخطاب
-قباء
-هشام بركات
-النزهة
-نادي الشمس
-ألف مسكن
-ميدان هليوبوليس
-هارون
-الأهرام
-كلية البنات
-ستاد القاهرة
-المعرض
-العباسية
-عبده باشا
-الجيش
-باب الشعرية
-العتبة
-ناصر
-ماسبيرو
-الزمالك
-الكيت كات
-السودان  
-إمبابة   
-المنيرة   
-الطريق الدائري   
-محور روض الفرج   
-التوفيقية   
-وادي النيل   
-مسجد مصطفى محمود   
-شهاب   
-بولاق الدكرور   
-جامعة القاهرة  

معرفة أقرب محطة مترو 

لمعرفة أقرب محطة مترو افتح تطبيق المترو على الهاتف ثم إضغط على "أقرب محطة كما بالصورة " ولكن تحتاج أولا الى تفعيل خيار تحديد الموقع على الهاتف
لكي يقوم التطبيق تلقائيا بتحديد موقعك الجغرافي ثم تحديد أقرب محطة مترو قريبة منك



فى النهاية اتمني ان يكون الشرح واضح وينال إعجابكم ..تحياتي

إرسال تعليق

أحدث أقدم